Dizayner səliqəsi. 1-ci hissə. Qovluq və fayllarla iş

müəllif: Rizvan Bağırlı
27 Yanvar 2017

Dizayner bütün günü səliqə-səhmanla məşğuldur. Dizaynı maksimum gözəlləşdirməyə çalışır, rənglərlə, formalarla, şriftlərlə eksperimentlər aparır. Sonda qane olduğu nəticəni tapıb işi tamamlayır. Amma bütün bunların fonunda çox vaxt dizaynerin özünün iş yerini də səliqəyə salan lazımdı. İş yeri dedikdə təbii ki, işlədiyi otağı, kabineti, stolunun üstünü nəzərdə tutmuram. Bu 3 hissəlik yazımda qrafik dizaynerin kompyuterindəki fayllar və qovluqlarla (papkalarla), yazdığı e-mail-lərlə rəftarı haqqında söhbət etmək istərdim.

Yuxarıda da qeyd etdim ki, çox vaxt dizaynerin öz işlədiyi yeri, kompyuterini səliqəyə salmaq lazımdır. Çünki o, hər hansı layihə üzərində işləyəndə faylları elə ekranda (dekstopda) da saxlayır. Faylın adı əksər hallarda qısa, heç bir məna verməyən bir ad olur. Günün birində bu dizayner xəstələnir, işi çıxır və işə gələ bilmir. Onun işlədiyi son faylı isə müştəriyə göndərmək lazımdır. İş yoldaşı açır dizaynerin kompyuterini və desktopda olan sonsuz fayldan diksinir. Gəl indi bu xaosun içindən lazım olan faylı tap. Bu tipli situasiyaların siyahısını fərqli misallarla uzada bilərəm.

Belə problemlərin olmaması üçün yaxşı olar ki, kompyuterdə ayrıca iş qovluğu, onun içində hər müştərinin ayrıca qovluğu olsun. Bu qovluqda isə layihələrə, işin mahiyyətinə görə fərqli qovluqlar olacaq. Dediklərimi konkret misalla izah etməyə çalışım.

İlk olaraq ayrıca Work qovluğu yaradıram. Burada da müştərinin adını qeyd etməklə, Bakcell qovluğu hazırlayıram: D diski — Work — Bakcell…

Bakcell Folder

İşlədiyim layihənin adına uyğun növbəti folderi də burada yaradıram. D diski — Work — Bakcell — Bax Neler Mumkundur… Səbrli olun az qaldı. Bu proyekt vaxtı bir çox reklam materialları hazırlanmalıdır. Bilbordlar, posterlər, laytbokslar, müxtəlif outdoor və çap reklam materialları və s. Bütün bu faylların hamısını bu qovluğun içində saxlasaq yenə kiçik qarışıqlıq əmələ gələcək. Ona görə bunların hər birinə görə ayrı folder hazırlasaq daha səliqəli olar. D diski — Work — Bakcell — Bax Neler Mumkundur — Billboard…

Bu qovluqda da iş prosesi zamanı hazırlanan faylları Process qovluğunda, müştəri tərəfindən təsdiqlənmiş və çapa hazırlanmış faylları da Print və ya Prepress qovluğunda saxlayıram. İş prosesində lazım olan fərqli sənədləri, faylları da Files qovluğuna qoyuram.

Ümumi sadaladığım struktur aşağıda çəkdiyim kimi olacaq.

Folder-Structure

İlk baxışdan çox uzun gələ bilər — bu nədire qovluq içində qovluq, qovluq içində qovluq… Amma inanın iş prosesində həm dizaynerə, həm də komandanın digər üzvlərinə bu formada işləmək çox rahat olacaq. Dizayner olmadıqda belə digər bir əməkdaş kompyuteri açıb asanlıqla lazım olan materialı tapa biləcək.

Faylın adını qoyduqda da məntiqli, başa düşülən bir ad qoymağa çalışın. İşlədiyiniz iş müştərinin şərhlərindən sonra bir neçə dəfə dəyişiləcək, düzəlişlər olunacaq. Hər dəfə eyni fayl üzərində işləməyin. Versiya 1-1, 1-2… formasında fərqli fayllarda saxlayın ki, birdən müştəri fikrindən vaz keçib daha əvvəl hazırladığınız variantı istəsə o da əl altında olsun.

Yuxarıda göstərdiyim qayda ideal bir qayda deyil. Hər kəs fərqli prinsiplə işləyə bilər. Əsas odur ki, dizaynerin əlinin altında da səliqə-səhman, sistemlilik olsun. Bu sistemi təkcə qrafik dizaynerlər və ya reklam işçiləri deyil, istənilən kompyuter istifadəçisi tətbiq edə bilər.

Növbəti dəfə isə  Photoshop-da Layer-lə iş haqqında fikirlərimi paylaşacam. Bəs siz hansı formada işləyirsiz? Öz fikirlərinizi bölüşün, müzakirə edək.

P.S. Yazıda qovluq sözü çox təkrarlanmasın deyə, bəzən “folder” istifadə etmişəm.

son yazılarım
27 Yanvar 2017